Eiusdem Leonis ad Martianum augustum

LXI. EIUSDEM LEONIS AD MARTIANUM AUGUSTUM.
INCIPIUNT TITULI.

I.
De Proterio Alexandrino episcopo ut priorum suorum decreta conservet.

II.
Ubi postulat imperatorem ut epistolam quam ad Flabianum [a] Constantinopolitanum episcopum miserat in Greco translatatam [b], Alexandrinae ecclesiae destinaret.
EXPLIUNT [c] CAPITULA.

fehlt
fehlt

LEO EPISCOPUS, MARTIANO AUGUSTO.
Puritatem fidei christianae qua clementia vestra praefulget, etiam his litteris quas frater et coepiscopus meus Nestorius detulit demonstrastis iustissimum fratri meo Proterio Alexandrinae urbis antistiti impendentes favorem, quo mihi per omnia esset acceptior. Nam cui vestra pietas testimonium perhibere dignatur, indubitanter esset probatus [d], etiam si taceret. Sed accedit ad gratiam quod proprio quoque sermone cognoscatur, quam sincerus sit catholici dogmatis predicator, ipsius professione clarescat. Unde plenissimo affectu dilectionem ortodoxi fratris amplector et deo gratias ago, quod amoto eo qui evangelio Christi voluit contraire, et sanctorum intellegentiae dissideret, alterum prospexit Alexandrinae ecclesiae sacerdotem, qui precedentibus rectoribus et fidei concordaret et vitae. Nam cum amplexus esset epistolam meam quam ad beatae memoriae Flavianum contra Euticem quae eum impium in toto corde profitetur misi, quid aliud quam apostolorum se ostendit esse discipulum, quoniam doctrina veritatis, in lumine suo permanet? Non potest esse diversum quod unum est atque individuum. Rescripsi itaque predito fratri quod debui, atque ut in sancto studio ut perseveret ammonui, qui sine dubio constantior erit, si etiam clementiae vestrae coortationibus adiuvetur. Nec in aliquo eum terreat quorundam imperita dissensio, quos paucorum hereticorum ||fol. 132rb|| instigationibus ignorantia facit obnoxios. Quod ergo sua neglegentia assequi nequeunt, oportuno eorum insinuetur auditui. Et ne memoratus [e] nova inferre et propria videatur astruere, venerabilium patrum qui eidem ecclesiae praefuerunt scripta legantur. Et quid beatus Atanasius, quid Theophilus, quid Lucius, quid etiam alii orientales magistri de carnatione domini senserint recognoscant, ne repullulantibus decipiantur erroribus, qui olim evangelici sermonis sunt virtute prostrati. Quoniam omnes fere hereses, quae diversis temporibus extiterunt dum sacramentum corporis, nativitatis et passionis ac resurrectionis Christi non intellegunt, ab evangelio deviarunt. Et possent minus laborare in hereticis repellendis, si rudes animos ea non turbarent mendatia, quae peremit antiquitas. Sed ut dixi hic docendi obtimus modus est, ut paternorum sensuum linea Alexandrinae plebis et clericorum auribus innotescat. Et si qui sunt qui nostra scripta despiciunt, illis saltim qui [f] nobiscum apostolicis sensibus congruunt adquiescant. In quo opere multum consacerdotis [g] nostri devotione gaudebo, et semper ipsius unanimitate lętabor. Quia fraterna pax, nonnisi fidei confessione servatur.


II.
fehlt

QUIA VERO QUORUNDAM hereticorum versuta nequitia, ad conturbandam sanctorum simplicitatem, epistolam meam quam ad beatae memoriae Flavianum dedi falsam esse perhibet, ut commutatis quibusdam verbis vel syllabis receptorem me Nestorianae heresis asserant, obsecro venerabilem clementiam vestram, ut eandem epistolam per fratrem meum Iulianum episcopum, vel eos quos idoneos ad hoc opus pietas vestra delegerit, in Grecum sermonem iubeatis integre diligenterque translatam per idoneum per latorem sub vestri signaculi inpressione deferri, tradendam iudicibus Alexandrinis, qui tam clero et plebi ipsius civitatis, quam predictorum episcoporum precationibus quibus ||fol. 132va|| mea scripta consentiant faciant recitari, ut agnoscant se fallacium hominum fraude ulterius decipi non debere. Et probentur apostolicae sedis sine errore esse discipuli, apud quam nec Eutices nec Nestorius ullum optinent locum. Quia sicut alios hereticos, ita et istos ecclesia universalis dampnavit. Data VI ID Martias.


Stand: 2008-03-02