Item eiusdem Hilari papae ad eundem Ascanium Tarraconensem episcopum

DILECTISSIMO FRATRI ASCANIO HILARIUS EPISCOPUS.
Divinę circa nos gratiae memores esse debemus, qui nos per dignationis suę misericordiam ob hoc ad fastigium sacerdotale provexit [a], ut mandatis ipsius inhaerentes, et in quadam sacerdotum eius specula constituti prohibeamus inlicita, et sequenda doceamus. Unde directis per Traianum subdiaconum [b] nostrum litteris admonemus, ut quae male sunt facta corrigantur. Et miramur admodum dilectionem tuam Barcilonensium petitiones non solum nulla auctoritate retudisse, verum etiam directis ad nos litteris conversationem pravi desiderii postulasse. Adhibendo in epistolarum proemio concilii [c] mentionem, tamquam culpae minuerentur excessus per multitudinem imperitorum. Cum si etiam sub significatione unusquisque sui nominis tecum pariter retulisset, et subscriptiones proprias fratres singuli commendassent, dilectionem tuam rei de qua displicet summa tangebat, quia pro loco et honore tibi debito ceteri sacerdotes docendi fuerant non sequendi. Unde sicut in generalibus litteris indicavi Hirineus ad propriam revertatur ecclesiam, et Barcilonensibus de suo clero protinus consecretur antistes. Cui tamen statuta canonum, et apostolica precepta concordent. Et licet hi qui pręter notitiam atque consensum tuę dilectionis ordinati sunt sacerdotes cum suis debuerint auctoribus submoveri, ne quid tamen in tanta necessitate decernamus austerum, eos qui episcopi facti sunt ita volumus permanere, si apostolicis pręceptionibus et statutis sanctorum patrum non repperiuntur obnoxii. Ac deinceps nihil quod contra disciplinam ęcclesiasticam veniat sicut actenus factum est perpetretur [d]. Tuae sollicitudinis est frater karissime debitam tibi auctoritatem tueri et inlicitis non modo non prebere adsensum, sed etiam cuncta quae contra regulam facta reppereris coercere. Atque ante omnia quae sola unitate decernimus Hireneum ad ecclęsiam suam redire compelle, ad quam sponte potius remeare debebit si sacerdotali consortio non metuit separari. Ne unius ecclesiae duo esse permittatur antistites quod post unius supradicti subdiaconi fieri delegamus instantia, quem etiam pro conservanda ecclesiae disciplina commeare ad Spanias dispositionis nostrae facit auctoritas. Deus autem incolomem te custodiat frater karissime.