Innocentius, Rufo, Gerontio, Sofronio, Flaviano, Macedonio, Prosdotio, et Oristeo episcopis, per Macedoniam constitutis. Mora coepiscoporum nostrorum Maximiani et Eumenii vel potius importunitas temporum, fecit ut vos iteraretis de Bubalio et Tauriano quęrimoniam, et nos iterum in homines ditissimos insurgeremus, sed ut possum paucioribus verbis malorum tantorum imitabor compendium, et strictim quę in volumine litterarum vestrarum conspexerim retractabo. Grave non oportuit videri piissimis mentibus vestris, cuiuscumque retractari iuditium. Quia veritas exagitata saepius, ||fol. 149vb|| magis splendescit in luce, et pernities revocata in iuditium gravius et sine poenitentia condempnatur. Nam fructus divinus est iustitiam sępius recenseri fratres karissimi. Verum illud video movisse animos vestros, quod in multis Bubalius saepe fallatiis depraehensus obiecerit exemplaria fictarum quasi a nobis litterarum, cum pro consuetudine hominis nihil quod proferret iam fide dignissimum videretur. Sed sileatur omne iam de tali negotio murmur, et convicti diaboli ipsi anhelitus comprimantur. Subiuncximus autem his priores litteras quas per memoratos episcopos miseramus, quibus ita plenaria sententia nostrorum sensuum designata est, ut dum relegeritis, nihil ambiguum, nihil requirendum in hac causa de cetero repetatis. Hanc autem paginulam [b] nostram sollicitius credentibus sibi episcopis relegendam mitte, ut sciant plenissime quid sit de Bubalio et Tauriano, ceterisque provintiarum ut servent qui digni ammonitione sunt, cavere a talibus ne talibus [c] sortiantur.
Stand: 2008-03-02