Innocentius, Agapito Macedonio et Mariano episcopis [b] Apulis. Multa in provintia contra canones ecclesiasticos decretaque maiorum usurpari a plurimis et relationes diversorum et suggestiones fidissime retulerunt. Quę quidem possent facile resecari, si episcopi in his non invenirentur auctores. Qui dum aut amicis aut obsequentibus gratiam prestare nituntur, religionem violant ordinesque corrumpunt. Ac sic [c] evenit ut indigni quique honores suscipiant ecclesiasticos, et admittantur ad clerum qui nec inter laicos quidem dignum locum habere merentur [d]. Sicuti in nunc dato nobis libello monstratum est, Modestum quendam multis criminibus involutum, propter quę etiam poenitentiam egisse dicitur, non solum clericum effectum quod non licet, verum etiam ad episcopatus apicem tendere. Cum canones apud Niceam constituti, poenitentes etiam ab infimis officiis clericorum excludant. Et ideo fratres karissimi perspecto tenore libelli, eum iubete presentari. Ac si vere constiterit talem qualem libellus affirmat, non solum ab ambitione, sed etiam a clericatus removeatur offitio.
Stand: 2008-03-02